ازاي تسافر برة مصر بأقل التكاليف

 هل فعلا لازم ترتاح في الكلية؟

كتير مننا سمع الجملة المشهورة "اتعب في الثانوية علشان ترتاح في الكلية", بس خليني أصدمك بإنها مقولة غلط جدا وان أهم مرحلة لازم تتعب فيها بجد علشان ترتاح هي مرحلة الكلية لأنها بتكون المرحلة الإنتقالية قبل تخرجك ودخولك في سوق العمل بشكل فعلي, وبالتالي فانت لازم تتعب في الكلية علشان ترتاح بعدين.

إزاي تستغل فترة الكلية صح؟

لازم خلال فترة الكلية دي تطور نفسك بشكل كويس علشان تجهز سيرة ذاتية محترمة تشرفك في أي مقابلة عمل.

وفيه خمس مراحل للتطوير ده..

تقديرك في الكلية:

كل اللي طالبه منك في المرحلة دي هو انك تجيب تقدير عام "جيد" يعني حوالي 65% وإياك تجيب مقبول لأن تقديرك لو من أول جيد هيخلي فرصتك للقبول أعلى وطبعا لو جبت تقدير جيد جدا أو امتياز هتزود فرصة قبولك.

الكورسات:

أهم حاجة تعملها في فترة الكلية هي انك تاخد كورسات وتجمع مجموعة من الشاهادات اللي تتقل الCV بتاعك. والموضوع حاليا بقى متاح وبشكل مجاني كمان, عندك مثلا جامعة هارفارد بتقدملك أكتر من 405 كورس بشهادات معتمدة تقدر تشوفهم من هنا في منهم المجاني ومنهم اللي بفلوس لكن هتلاقي المجاني كتير وبمحتوى محترم جدا.

وفيه كمان شركة HP بتقدملك 27 كورس بشهادات معتمدة في أكتر من مجال تقدر تشوفهم من هنا.

وفيه أكتر من منصة بتقدملك عدد كبير جدا من الكورسات والشاهادات المعتمدة أبرزهم كورسيرا و يوديمي.

القراءة:

من أهم المراحل اللي بينساها كتير مننا هي مرحلة القراءة وتجميع البيانات اللي بتخص التخصص أو الوظيفة المراد الإلتحاق بيها, ودلوقتي بقت الوسيلة دي سهلة ومتوفرة عن طريق "مكاتب مصر العامة" اللي موجودة في جميع محافظات مصر.

التطوع والأنشطة:

ودي من أهم المراحل اللي بتقوي نسبة قبولك في أي حاجة عمتا سواء سفر أو منح أو شغل لأنهم بيكونوا عايزين حد نشيط وعنده مرونة فكرية واشتغل في شكل فريق وبيحب العمل الجماعي وتفاصيل كتير بتتوفر في الأنشطة الطلابية أو في التطوع في المؤسسات والجمعيات.

المنح:

ودي سيبناها في الاخر لأنها من غير الحاجات اللي ذكرتها فوق هتبقى فرصها صعبة جدا, لكن لما تبقى قارئ جيد ودخلت أكتر من نشاط تطوعي أو معاك كورسات وشهادات معتمدة فكل ده بيأهلك انك تتقبل في منح مختلفة.

لو عملت كل الحاجات دي في فترة الكلية بتاعتك هتلاقي نفسك بعد التخرج معاك CV دسم جدا ومشرف وهتلاقي فرص قبولك في الوظائف مرتفعة جدا.