خلاص أغلبنا بدأ الاجازة الصيفية وكل واحد بدأ يخطط ازاي يستغل الاجازة دي علشان يطلع منها مستفيد.
وانا بالمقالة دي وفرت عليك كتير أوي لاني هعرفك فيها أهم 4 حاجات من وجهة نظري تقدر تعملهم في الاجازة.
التدريب الصيفي:
التدريب الصيفي واحد من أهم الحاجات اللي بيعملها الطلاب خلال الاجازة, لانها بتزود من كفاءتهم وبتديهم خبرات وبتخليهم يحتكوا بسوق العمل بشكل فعلي.
طب فين الاقي فرص التدريب الصيفي؟
بعد بحث وتدقيق لقيت ان فيه جروب على فيسبوك ممكن يفيدك جدا سواء في التدريب الصيفي أو في حاجات تانية كتير واسم الجروب ده هو Events, scholarships & volunteering .
ولقيت 3 جروبات على تطبيق تليجرام قمة في الروعة وهم Summer training & jobs و المعرفة و بتاع شغل .
المنح والكورسات:
المنح والكورسات هم أكتر حاجة لازم تسعى وتدور عليهم خلال فترة اجازتك لان هم اللي هيطوروك ويحسنوا اداءك ويزودوا فرصك بعد كده.
واتنين من أهم المواقع العربية اللي بيقدمولك منح هم مرجع و فرصة.
أما بقى لو جينا لمجال الكورسات فهتلاقي مواقع كتيير جدااا ومنها الأجنبي ومنها العربي يعني ملكش حجة عندك مثلا مواقع أجنبية زي Harvard و Udacity و Udemy و Coursera وبرضه المواقع العربية موجودة وبكثرة وعلى رأسهم إدراك و رواق و شروح .
تعلم مهارات هامة:
وفيه بقى شوية مجالات كده يعتبروا كنز حقيقي لازم تتعلمهم والاجازة وقت مناسب جدا انك تبدأ تتعلم فيه وتطور نفسك في المجالات دي وهم الفوتوشوب وتعديل الصور عمتا والمونتاج والبرمجة والتسويق الالكتروني..وزي ما عودتكم دايما اني هسيبلكم الاماكن اللي تلاقوا فيها كل حاجة ممكن تحتاجوها.
فعندك مثلا في التسويق الالكتروني منحة وزارة الاتصالات وعندك في احتراف اعلانات الفيسبوك كورس جامد جدا من يوديمي تقدر تشوفه من هنا وفي المونتاج والفوتوشوب فيه فيديوهين جمال جدا عملهم أحمد أبو زيد تقدر تشوفهم من هنا و من هنا .
ازاي تجيب فلوس؟
بعد ما تاخد الكورسات والمنح وتتعلم الكام مهارة أو تدخل المجالات اللي قولتلك عليها فانت بقيت مؤهل انك تحول خبرتك دي لفلوس وده عن طريق منصات كتير جدا تقدر تعرض عليها شغلك وتلاقي اللي يشتري منك وأهم المنصات دي من وجهة نظري هم خمسات و fiverr و الحريفة و freelancer .
وبس كده يا سيدي انت كده تقدر تستغل اجازتك بشكل جامد جدا ومفيد جدا ومتنساش بقى تدعيلي وتشارك المقالة دي مع زمايلك علشان يستفادوا زي ما انت استفادت.
تعليقات
إرسال تعليق