ازاي تسافر برة مصر بأقل التكاليف

 وظيفة  مسئول الموارد البشرية أو الـ"HR" بقت من أهم الوظايف اللي بيهتم بيها جيل الشباب وده بسبب امتيازاتها وانها وظيفة متجددة وبتحتاج تفكير شبابي مبدع وكل فترة بتتحدث وبتجدد نفسها وأساليبها فبتزيد نسبة الاستمتاع وبتقل نسبة الملل، وأظن شئ حلو ان شغلك يكون سبب تسليتك.

 

ما هي مميزات وظيفة الـHR؟

للوظيفة دي مميزات كتير أوي أهمهم مثلا...

• ملهاش كلية معينة لازم تبقى متخرج منها يعني أي حد يقدر يشتغل على نفسه ويدخل المجال ده.
• فلوسها كويسة بحيث إنك لو شغال في شركة مثلا فغالبا هتكون انت صاحب أعلى تاني مرتب بعد البيع والتسويق.
• بتكون واجهة اجتماعية حلوة ليك يعني تخيل واحد يسأل انت شغال ايه فترد عليه بحرفين انجليزي فيحسك شغال في الأمم المتحدة مثلا، وحتى لو عرف انك مسئول موارد بشرية برضه هيفضل شايفك حاجة كبيرة وبالمناسبة انا برضه بأكدلك انك فعلا حاجة كبيرة.
• أغلب أماكن الشغل المتاحة بتكون شركات مريحة من اللي بتوزع شيكولاتة في الأعياد وعندهم تكييفات وبيطلعوا رحلات أسرية كل ويك إند.

قواعد أساسية لازم تتبعها عشان تبقى HR بالشكل الصح...

• لازم لازم لازم تكون شخصيتك مرنة وقادر تتعامل مع كل فئات المجتمع لأنك هتقابل الذكي والغبي والعصبي والكسول والمتكبر والمتسرع وكل حاجة لأن وظيفتك كمسئول موارد بشرية بتخليك تتعامل مع أغلب أو كل اللي شغالين معاك بمختلف أيدلوجياتهم.
• انت اللي هتكون مسئول عن تطوير أعضاء المؤسسة اللي انت بتشتغل فيها وبالتالي فانت لازم أصلا من البداية تكون بتطور بشكل مستمر وعندك قابلية التعلم علشان تقدر كل فترة تكتسب مهارات جديدة وأفكار كويسة علشان من خلالها تقدر تطور العاملين.
• النقطة دي مش لازم لكنها مهمة جدا جدا جدااا وهي الأنجليزي بتاعك أو اللغات بشكل عام، لو حابب تشتغل في مكان أي كلام وبمرتب متواضع فمبروك عليك انت مش محتاج تطور لغتك بس صدقني هتندم بعد كده، أما بقى لو عايز تشتغل في مكان محترم وتاخد أجر عالي فلازم تحسن الإنجليزي بتاعك علشان الشركات الكبيرة بتحط اللغة كشرط أساسي ولو عايز تحسن الإنجليزي بتاعك فاحنا نزلنا أكتر من موضوع عن تحسين الأنجليزي تقدر ترجعلهم وتابع معانا علشان لسة هننزل مواضيع تانية كتير عن تحسين اللغة.
• فيه شوية حاجات كده نظرية لازم يبقى عندك خلفية عنها زي قانون العمل الخاص بالمجال -قانون رقم 13 لسنة 2003- ولازم برضه تعرف ايه هي التأمينات الإجتماعية والصحية ويعني شئون العاملين وايه هي أنواع الأجازات والعقود وطبعا مش محتاج اأكد عليك انك لازم متكسلش او تطنش دانا كنت لسة بقولك ان لازم يكون عندك قابلية التعلم!
• لازم تفتكر دايما انك كنت محتاج الوظيفة دي فلو مسكتها في يوم وعملت انترفيو لحد متبقاش متكبر عليه أو ناوي تتحكم فيه لأن النفخة الكدابة دي هتوقعك وتخليك HR فاشل.
• وظيفة زي دي بتخليك انت واجهة المؤسسة فاهتم بشكلك ولبسك ومنظرك العام لأن حتى لو انت شاطر في شغل بس مهمل في شكلك صعب ان مكان يقبلك لأنك هتكون الواجهة بتاعته.

إزاي أقتحم مجال الموارد البشرية؟

• بعد ما تعمل اللي قولتلك عليه وتلم معلومات عن المجال ده وتحس انك خلاص فاهم الدنيا حاول تنزل تدريب في أي شركة وهتلاقي فيه اللي بأجر وفيه اللي من غير المهم تنزل وتكتسب خبرة بشكل حقيقي على أرض الواقع وتقدر تدور على التدريبات دي في موقع أو تطبيق linkedin ولو متعرفش ده ايه فاستنى قريب هحاول أنزل موضوع عنه.
• طور من استخدامك في الكمبيوتر بالذات في برامج زي الWord و PowerPoint و Excel عشان بنسبة كبيرة هتحتاجهم.
• متنساااش تحسن مستواك في الإنجليزي.

دول تقريبا هم أهم الحاجات اللي تخليك مؤهل انك تدخل المجال ده من أوسع أبوابه وتنجح فيه وان شاء الله مش هيكون ده الموضوع الأخير وهحاول أنزل مواضيع تانية عن المجال ده بشكل متعمق أكتر.