ازاي تسافر برة مصر بأقل التكاليف

 الانجليزي بقى من أهم اللغات اللي لازم تكتسبها علشان تكون مؤهل لسوق العمل وفي موضوعنا اللي فات " إزاي تدخل مجال الـHR " كلمتكم عن قد ايه دراسة اللغة الإنجليزية وتطويرها هيفيدك جدا في حياتك العملية وهيثبت وجودك وبقوة داخل سوق العمل.

وعلشان كده جبتلكم النهاردة 7 قنوات انا شايف من وجهة نظري انهم أهم قنوات قادرة تساعدك في تعلم اللغة الإنجليزية وانك تعلي مستواك فيها بشكل ملحوظ ومن غير مجهود ولا هتضطر تاني تنزل وتروح تاخد كورسات أو تتبهدل في مواصلات، لا دانت تقدر دلوقتي تتعلم وتتطور وانت قاعد في بيتك وعلى سريرك كمان.

الفيديو ده هيشرحلك أكتر ال7 قنوات دول بشكل عملي متنساش تشوفه..

ولو حابب تشوف الفيديو من اليوتيوب بشكل مباشر اضغط هنا

أول قناة معانا هي قناة ZAmericanEnglish:

وهي قناة مشهورة جدا يعرفها أغلب الناس اللي بتهتم بتحسين مستواها في تعلم اللغة الإنجليزية وهي للمحترم الأستاذ ابراهيم عادل، واللي بيميز القناة دي عن غيرها هي انها مش بتبخل عليك بأي معلومة وانها منظمة جدا وعلى درجة عالية من الإحترافية.

وعاملين تطبيق حلو جدا بنفس اسم القناة تقدر تحمله من هنا وهتلاقيه سهل جدا وبسيط ومنظم وبشكل احترافي وسهل.

تاني قناة معانا هي قناة English Language Academy:

وهي قناة جميلة جدا على اليوتيوب بتعلمك انجليزي عن طريق فيديوهات لمحادثات أو مشاهد من أفلام وبتعلمك ازاي تنطق صح وبتعودك تسمع صح وبتتمرن معاها على تحسين مستواك في اللغة الإنجليزي.

تالت قناة معانا هي قناة دروس أونلاين:

وهي ملك لـ أحمد أبوزيد وهو من أكتر الناس المجتهدة على يوتيوب وبيحاول يوصلك المعلومة بأكتر من شكل وبطريقة بسيطة تساعدك انك تفهم بسرعة وتقريبا يعتبر هو من أحسن الناس اللي تقدر تشرحلك وتفهمك قواعد اللغة بشكل سليم وشامل بحيث انه بيشرحلك القاعدة وشواذها ومش بيسيب فيها أي حاجة غير لما يقولها.

رابع قناة هي قناة engVid:

وهي عبارة عن مجموعة أشخاص أجانب بيشرحولك القواعد والكلمات والمواقف..الخ والحلو واللي بيميزها هي إنها بتعرضلك أكتر من حد ممكن يشرحلك وانت بتختار اللي تحبه وترتاحله وبتحس انك بتطور معاه.

خامس قناة معانا هي قناة Learn English with Ehab:

وهي لمالكها إيهاب رشوان وهي متخصصة في النطق البريطاني والحلو فيها انها منظمة ومتقسمة في قوايم تشغيل والقناة مسلية جدا بحيث انه بيمثلك مشاهد وبتحس انك مبسوط وانت بتتفرج عليه وايهاب نظرا انه راجل صعيدي فلما هيتكلم عربي هتحس انك بتكلم واحد قريب منك وابن بلد لكن لما يتكلم انجليزي تحس انك بتكلم مواطن لسة جاي من انجلترا.

سادس قناة معانا هي قناة YallaSpeak:

وهي لمالكها إيهاب رمزي والحلو بجد فيه هو خفة دمه وانه انسان خفيف جدا على القلب وبرضه بيحاول يمثلك المحادثات عشان توصلك بسهولة وهو من الناس الخبرة جدا في المجال ده، وكمان هيفيدك جدا لو مهتم بمجال البيزنيس ومصطلحاته.

سابع قناة والأخيرة هي قناة TEDx Talks:

وانا حبيت أسيبها في الآخر لأن القناة دي مينفعش تبدأ بيها لو انت حد ميح انجليزي ولسة بتبدأ لأن القناة عبارة عن ناس بتتكلم انجليزي وانت بتشغل الترجمة علشان تعود ودنك تسمع انجليزي وبعد كده مع الوقت بتشيل الترجمة وتحاول تسمع من غيرها وتدرب نفسك هل بقيت بتعرف تميز الكلام وتنطقه ولا لأ، فتقدر تقول انها قناة عملية مش تعليمية.

أتمنى تكونوا استفادتم من المقالة دي وشاركوها مع صحابكم اللي عايزين يتعلموا انجليزي صح.